15.448 καὶ χρυσόν , ὅτις χʹ ὑποχείριος ἔλθῃ ·
15.449 καὶ δέ κεν ἄλλʹ ἐπίβαθρον ἐγὼν ἐθέλουσά γε δοίην .
15.450 παῖδα γὰρ ἀνδρὸς ἑῆος ἐνὶ μεγάροις ἀτιτάλλω ,
15.451 κερδαλέον δὴ τοῖον , ἅμα τροχόωντα θύραζε ·
15.452 τόν κεν ἄγοιμʹ ἐπὶ νηός , ὁ δʹ ὑμῖν μυρίον ὦνον
15.453 ἄλφοι , ὅπῃ περάσητε κατʹ ἀλλοθρόους ἀνθρώπους .
15.454 ἡ μὲν ἄρʹ ὣς εἰποῦσʹ ἀπέβη πρὸς δώματα καλά ,
15.455 οἱ δʹ ἐνιαυτὸν ἅπαντα παρʹ ἡμῖν αὖθι μένοντες
15.456 ἐν νηῒ γλαφυρῇ βίοτον πολὺν ἐμπολόωντο .
15.457 ἀλλʹ ὅτε δὴ κοίλη νηῦς ἤχθετο τοῖσι νέεσθαι ,
15.458 καὶ τότʹ ἄρʹ ἄγγελον ἧκαν , ὃς ἀγγείλειε γυναικί .
15.459 ἤλυθʹ ἀνὴρ πολύϊδρις ἐμοῦ πρὸς δώματα πατρὸς
15.460 χρύσεον ὅρμον ἔχων , μετὰ δʹ ἠλέκτροισιν ἔερτο .
15.461 τὸν μὲν ἄρʹ ἐν μεγάρῳ δμῳαὶ καὶ πότνια μήτηρ
15.462 χερσίν τʹ ἀμφαφόωντο καὶ ὀφθαλμοῖσιν ὁρῶντο ,
15.463 ὦνον ὑπισχόμεναι · ὁ δὲ τῇ κατένευσε σιωπῇ .
15.464 ἦ τοι ὁ καννεύσας κοίλην ἐπὶ νῆα βεβήκει ,
15.465 ἡ δʹ ἐμὲ χειρὸς ἑλοῦσα δόμων ἐξῆγε θύραζε .
15.466 εὗρε δʹ ἐνὶ προδόμῳ ἠμὲν δέπα ἠδὲ τραπέζας
15.467 ἀνδρῶν δαιτυμόνων , οἵ μευ πατέρʹ ἀμφεπένοντο .
15.468 οἱ μὲν ἄρʹ ἐς θῶκον πρόμολον , δήμοιό τε φῆμιν ,
15.469 ἡ δʹ αἶψα τρίʹ ἄλεισα κατακρύψασʹ ὑπὸ κόλπῳ
15.470 ἔκφερεν · αὐτὰρ ἐγὼν ἑπόμην ἀεσιφροσύνῃσι .
15.471 δύσετό τʹ ἠέλιος , σκιόωντό τε πᾶσαι ἀγυιαί ·
15.472 ἡμεῖς δʹ ἐς λιμένα κλυτὸν ἤλθομεν ὦκα κιόντες ,
15.473 ἔνθʹ ἄρα Φοινίκων ἀνδρῶν ἦν ὠκύαλος νηῦς .
15.474 οἱ μὲν ἔπειτʹ ἀναβάντες ἐπέπλεον ὑγρὰ κέλευθα ,
15.475 νὼ ἀναβησάμενοι · ἐπὶ δὲ Ζεὺς οὖρον ἴαλλεν .
15.476 ἑξῆμαρ μὲν ὁμῶς πλέομεν νύκτας τε καὶ ἦμαρ ·