15.390 ξεῖνʹ , ἐπεὶ ἂρ δὴ ταῦτά μʹ ἀνείρεαι ἠδὲ μεταλλᾷς ,
15.391 σιγῇ νῦν ξυνίει καὶ τέρπεο , πῖνέ τε οἶνον
15.392 ἥμενος . αἵδε δὲ νύκτες ἀθέσφατοι · ἔστι μὲν εὕδειν ,
15.393 ἔστι δὲ τερπομένοισιν ἀκούειν · οὐδέ τί σε χρή ,
15.394 πρὶν ὥρη , καταλέχθαι · ἀνίη καὶ πολὺς ὕπνος .
15.395 τῶν δʹ ἄλλων ὅτινα κραδίη καὶ θυμὸς ἀνώγει ,
15.396 εὑδέτω ἐξελθών · ἅμα δʹ ἠοῖ φαινομένηφι
15.397 δειπνήσας ἅμʹ ὕεσσιν ἀνακτορίῃσιν ἑπέσθω .
15.398 νῶϊ δʹ ἐνὶ κλισίῃ πίνοντέ τε δαινυμένω τε
15.399 κήδεσιν ἀλλήλων τερπώμεθα λευγαλέοισι ,
15.400 μνωομένω · μετὰ γάρ τε καὶ ἄλγεσι τέρπεται ἀνήρ ,
15.401 ὅς τις δὴ μάλα πολλὰ πάθῃ καὶ πόλλʹ ἐπαληθῇ .
15.402 τοῦτο δέ τοι ἐρέω ὅ μʹ ἀνείρεαι ἠδὲ μεταλλᾷς .
15.403 νῆσός τις Συρίη κικλήσκεται , εἴ που ἀκούεις ,
15.404 Ὀρτυγίης καθύπερθεν , ὅθι τροπαὶ ἠελίοιο ,
15.405 οὔ τι περιπληθὴς λίην τόσον , ἀλλʹ ἀγαθὴ μέν ,
15.406 εὔβοτος , εὔμηλος , οἰνοπληθής , πολύπυρος .
15.407 πείνη δʹ οὔ ποτε δῆμον ἐσέρχεται , οὐδέ τις ἄλλη
15.408 νοῦσος ἐπὶ στυγερὴ πέλεται δειλοῖσι βροτοῖσιν ·
15.409 ἀλλʹ ὅτε γηράσκωσι πόλιν κάτα φῦλʹ ἀνθρώπων ,
15.410 ἐλθὼν ἀργυρότοξος Ἀπόλλων Ἀρτέμιδι ξὺν
15.411 οἷς ἀγανοῖς βελέεσσιν ἐποιχόμενος κατέπεφνεν .
15.412 ἔνθα δύω πόλιες , δίχα δέ σφισι πάντα δέδασται ·
15.413 τῇσιν δʹ ἀμφοτέρῃσι πατὴρ ἐμὸς ἐμβασίλευε ,
15.414 Κτήσιος Ὀρμενίδης , ἐπιείκελος ἀθανάτοισιν .
15.415 ἔνθα δὲ Φοίνικες ναυσίκλυτοι ἤλυθον ἄνδρες ,
15.416 τρῶκται , μυρίʹ ἄγοντες ἀθύρματα νηῒ μελαίνῃ .
15.417 ἔσκε δὲ πατρὸς ἐμοῖο γυνὴ Φοίνισσʹ ἐνὶ οἴκῳ ,
15.418 καλή τε μεγάλη τε καὶ ἀγλαὰ ἔργα ἰδυῖα ·
15.419 τὴν δʹ ἄρα Φοίνικες πολυπαίπαλοι ἠπερόπευον .
15.420 πλυνούσῃ