15.360 ἔρδοι .
15.361 ὄφρα μὲν οὖν δὴ κείνη ἔην , ἀχέουσά περ ἔμπης ,
15.362 τόφρα τί μοι φίλον ἔσκε μεταλλῆσαι καὶ ἐρέσθαι ,
15.363 οὕνεκά μʹ αὐτὴ θρέψεν ἅμα Κτιμένῃ τανυπέπλῳ ,
15.364 θυγατέρʹ ἰφθίμῃ , τὴν ὁπλοτάτην τέκε παίδων ·
15.365 τῇ ὁμοῦ ἐτρεφόμην , ὀλίγον δέ τί μʹ ἧσσον ἐτίμα .
15.366 αὐτὰρ ἐπεί ῥʹ ἥβην πολυήρατον ἱκόμεθʹ ἄμφω ,
15.367 τὴν μὲν ἔπειτα Σάμηνδʹ ἔδοσαν καὶ μυρίʹ ἕλοντο ,
15.368 αὐτὰρ ἐμὲ χλαῖνάν τε χιτῶνά τε εἵματʹ ἐκείνη
15.369 καλὰ μάλʹ ἀμφιέσασα , ποσὶν δʹ ὑποδήματα δοῦσα
15.370 ἀγρόνδε προΐαλλε · φίλει δέ με κηρόθι μᾶλλον .
15.371 νῦν δʹ ἤδη τούτων ἐπιδεύομαι · ἀλλά μοι αὐτῷ
15.372 ἔργον ἀέξουσιν μάκαρες θεοὶ ᾧ ἐπιμίμνω ·
15.373 τῶν ἔφαγόν τʹ ἔπιόν τε καὶ αἰδοίοισιν ἔδωκα .
15.374 ἐκ δʹ ἄρα δεσποίνης οὐ μείλιχον ἔστιν ἀκοῦσαι
15.375 οὔτʹ ἔπος οὔτε τι ἔργον , ἐπεὶ κακὸν ἔμπεσεν οἴκῳ ,
15.376 ἄνδρες ὑπερφίαλοι · μέγα δὲ δμῶες χατέουσιν
15.377 ἀντία δεσποίνης φάσθαι καὶ ἕκαστα πυθέσθαι
15.378 καὶ φαγέμεν πιέμεν τε , ἔπειτα δὲ καί τι φέρεσθαι
15.379 ἀγρόνδʹ , οἷά τε θυμὸν ἀεὶ δμώεσσιν ἰαίνει .
15.380 τὸν δʹ ἀπαμειβόμενος προσέφη πολύμητις Ὀδυσσεύς ·
15.381 ὢ πόποι , ὡς ἄρα τυτθὸς ἐών , Εὔμαιε συβῶτα ,
15.382 πολλὸν ἀπεπλάγχθης σῆς πατρίδος ἠδὲ τοκήων .
15.383 ἀλλʹ ἄγε μοι τόδε εἰπὲ καὶ ἀτρεκέως κατάλεξον ,
15.384 ἠὲ διεπράθετο πτόλις ἀνδρῶν εὐρυάγυια ,
15.385 ᾗ ἔνι ναιετάασκε πατὴρ καὶ πότνια μήτηρ ,
15.386 ἦ σέ γε μουνωθέντα παρʹ οἴεσιν ἢ παρὰ βουσὶν
15.387 ἄνδρες δυσμενέες νηυσὶν λάβον ἠδʹ ἐπέρασσαν
15.388 τοῦδʹ ἀνδρὸς πρὸς δώμαθʹ , ὁ δʹ ἄξιον ὦνον ἔδωκε .
15.389 τὸν δʹ αὖτε προσέειπε συβώτης , ὄρχαμος ἀνδρῶν ·