15.241 γυναῖκα καὶ ὑψερεφὲς θέτο δῶμα ,
15.242 γείνατο δʹ Ἀντιφάτην καὶ Μάντιον , υἷε κραταιώ .
15.243 Ἀντιφάτης μὲν ἔτικτεν Ὀϊκλῆα μεγάθυμον ,
15.244 αὐτὰρ Ὀϊκλείης λαοσσόον Ἀμφιάραον ,
15.245 ὃν περὶ κῆρι φίλει Ζεύς τʹ αἰγίοχος καὶ Ἀπόλλων
15.246 παντοίην φιλότητʹ · οὐδʹ ἵκετο γήραος οὐδόν ,
15.247 ἀλλʹ ὄλετʹ ἐν Θήβῃσι γυναίων εἵνεκα δώρων .
15.248 τοῦ δʹ υἱεῖς ἐγένοντʹ Ἀλκμαίων Ἀμφίλοχός τε .
15.249 Μάντιος αὖ τέκετο Πολυφείδεά τε Κλεῖτόν τε ·
15.250 ἀλλʹ ἦ τοι Κλεῖτον χρυσόθρονος ἥρπασεν Ἠὼς
15.251 κάλλεος εἵνεκα οἷο , ἵνʹ ἀθανάτοισι μετείη ·
15.252 αὐτὰρ ὑπέρθυμον Πολυφείδεα μάντιν Ἀπόλλων
15.253 θῆκε βροτῶν ὄχʹ ἄριστον , ἐπεὶ θάνεν Ἀμφιάραος ·
15.254 ὅς ῥʹ Ὑπερησίηνδʹ ἀπενάσσατο πατρὶ χολωθείς ,
15.255 ἔνθʹ ὅ γε ναιετάων μαντεύετο πᾶσι βροτοῖσιν .
15.256 τοῦ μὲν ἄρʹ υἱὸς ἐπῆλθε , Θεοκλύμενος δʹ ὄνομʹ ἦεν ,
15.257 ὃς τότε Τηλεμάχου πέλας ἵστατο · τὸν δʹ ἐκίχανεν
15.258 σπένδοντʹ εὐχόμενόν τε θοῇ παρὰ νηῒ μελαίνῃ ,
15.259 καί μιν φωνήσας ἔπεα πτερόεντα προσηύδα ·
15.260 ὦ φίλʹ , ἐπεί σε θύοντα κιχάνω τῷδʹ ἐνὶ χώρῳ ,
15.261 λίσσομʹ ὑπὲρ θυέων καὶ δαίμονος , αὐτὰρ ἔπειτα
15.262 σῆς τʹ αὐτοῦ κεφαλῆς καὶ ἑταίρων , οἵ τοι ἕπονται ,
15.263 εἰπέ μοι εἰρομένῳ νημερτέα μηδʹ ἐπικεύσῃς ·
15.264 τίς πόθεν εἶς ἀνδρῶν ; πόθι τοι πόλις ἠδὲ τοκῆες ;
15.265 τὸν δʹ αὖ Τηλέμαχος πεπνυμένος ἀντίον ηὔδα ·
15.266 τοιγὰρ ἐγώ τοι , ξεῖνε , μάλʹ ἀτρεκέως ἀγορεύσω .
15.267 ἐξ Ἰθάκης γένος εἰμί , πατὴρ δέ μοί ἐστιν Ὀδυσσεύς ,
15.268 εἴ ποτʹ ἔην · νῦν δʹ ἤδη ἀπέφθιτο λυγρῷ ὀλέθρῳ .
15.269 τοὔνεκα νῦν ἑτάρους τε λαβὼν καὶ νῆα μέλαιναν
15.270 ἦλθον πευσόμενος πατρὸς δὴν οἰχομένοιο .
15.271 τὸν δʹ