15.212 κείνου θυμὸς ὑπέρβιος , οὔ σε μεθήσει ,
15.213 ἀλλʹ αὐτὸς καλέων δεῦρʹ εἴσεται , οὐδέ ἕ φημι
15.214 ἂψ ἰέναι κενεόν · μάλα γὰρ κεχολώσεται ἔμπης .
15.215 ὣς ἄρα φωνήσας ἔλασεν καλλίτριχας ἵππους
15.216 ἂψ Πυλίων εἰς ἄστυ , θοῶς δʹ ἄρα δώμαθʹ ἵκανε .
15.217 Τηλέμαχος δʹ ἑτάροισιν ἐποτρύνων ἐκέλευσεν ·
15.218 ἐγκοσμεῖτε τὰ τεύχεʹ , ἑταῖροι , νηῒ μελαίνῃ ,
15.219 αὐτοί τʹ ἀμβαίνωμεν , ἵνα πρήσσωμεν ὁδοῖο .
15.220 ὣς ἔφαθʹ , οἱ δʹ ἄρα τοῦ μάλα μὲν κλύον ἠδʹ ἐπίθοντο ,
15.221 αἶψα δʹ ἄρʹ εἴσβαινον καὶ ἐπὶ κληῗσι καθῖζον .
15.222 ἦ τοι ὁ μὲν τὰ πονεῖτο καὶ εὔχετο , θῦε δʹ Ἀθήνῃ
15.223 νηῒ πάρα πρυμνῇ · σχεδόθεν δέ οἱ ἤλυθεν ἀνὴρ
15.224 τηλεδαπός , φεύγων ἐξ Ἄργεος ἄνδρα κατακτάς ,
15.225 μάντις · ἀτὰρ γενεήν γε Μελάμποδος ἔκγονος ἦεν ,
15.226 ὃς πρὶν μέν ποτʹ ἔναιε Πύλῳ ἔνι , μητέρι μήλων ,
15.227 ἀφνειὸς Πυλίοισι μέγʹ ἔξοχα δώματα ναίων ·
15.228 δὴ τότε γʹ ἄλλων δῆμον ἀφίκετο , πατρίδα φεύγων
15.229 Νηλέα τε μεγάθυμον , ἀγαυότατον ζωόντων ,
15.230 ὅς οἱ χρήματα πολλὰ τελεσφόρον εἰς ἐνιαυτὸν
15.231 εἶχε βίῃ . ὁ δὲ τῆος ἐνὶ μεγάροις Φυλάκοιο
15.232 δεσμῷ ἐν ἀργαλέῳ δέδετο , κρατέρʹ ἄλγεα πάσχων
15.233 εἵνεκα Νηλῆος κούρης ἄτης τε βαρείης ,
15.234 τήν οἱ ἐπὶ φρεσὶ θῆκε θεὰ δασπλῆτις Ἐρινύς .
15.235 ἀλλʹ ὁ μὲν ἔκφυγε κῆρα καὶ ἤλασε βοῦς ἐριμύκους
15.236 ἐς Πύλον ἐκ Φυλάκης καὶ ἐτίσατο ἔργον ἀεικὲς
15.237 ἀντίθεον Νηλῆα , κασιγνήτῳ δὲ γυναῖκα
15.238 ἠγάγετο πρὸς δώμαθʹ . ὁ δʹ ἄλλων ἵκετο δῆμον ,
15.239 Ἄργος ἐς ἱππόβοτον · τόθι γάρ νύ οἱ αἴσιμον ἦεν
15.240 ναιέμεναι πολλοῖσιν ἀνάσσοντʹ Ἀργείοισιν
15.241 ἔνθα δʹ ἔγημε