10.501 , τίς γὰρ ταύτην ὁδὸν ἡγεμονεύσει ;
10.502 εἰς Ἄϊδος δʹ οὔ πώ τις ἀφίκετο νηὶ μελαίνῃ .
10.503 ὣς ἐφάμην , ἡ δʹ αὐτίκʹ ἀμείβετο δῖα θεάων ·
10.504 διογενὲς Λαερτιάδη , πολυμήχανʹ Ὀδυσσεῦ ,
10.505 μή τί τοι ἡγεμόνος γε ποθὴ παρὰ νηὶ μελέσθω ,
10.506 ἱστὸν δὲ στήσας , ἀνά θʹ ἱστία λευκὰ πετάσσας
10.507 ἧσθαι · τὴν δέ κέ τοι πνοιὴ Βορέαο φέρῃσιν .
10.508 ἀλλʹ ὁπότʹ ἂν δὴ νηὶ διʹ Ὠκεανοῖο περήσῃς ,
10.509 ἔνθʹ ἀκτή τε λάχεια καὶ ἄλσεα Περσεφονείης ,
10.510 μακραί τʹ αἴγειροι καὶ ἰτέαι ὠλεσίκαρποι ,
10.511 νῆα μὲν αὐτοῦ κέλσαι ἐπʹ Ὠκεανῷ βαθυδίνῃ ,
10.512 αὐτὸς δʹ εἰς Ἀίδεω ἰέναι δόμον εὐρώεντα .
10.513 ἔνθα μὲν εἰς Ἀχέροντα Πυριφλεγέθων τε ῥέουσιν
10.514 Κώκυτός θʹ , ὃς δὴ Στυγὸς ὕδατός ἐστιν ἀπορρώξ ,
10.515 πέτρη τε ξύνεσίς τε δύω ποταμῶν ἐριδούπων ·
10.516 ἔνθα δʹ ἔπειθʹ , ἥρως , χριμφθεὶς πέλας , ὥς σε κελεύω ,
10.517 βόθρον ὀρύξαι , ὅσον τε πυγούσιον ἔνθα καὶ ἔνθα ,
10.518 ἀμφʹ αὐτῷ δὲ χοὴν χεῖσθαι πᾶσιν νεκύεσσιν ,
10.519 πρῶτα μελικρήτῳ , μετέπειτα δὲ ἡδέι οἴνῳ ,
10.520 τὸ τρίτον αὖθʹ ὕδατι · ἐπὶ δʹ ἄλφιτα λευκὰ παλύνειν .
10.521 πολλὰ δὲ γουνοῦσθαι νεκύων ἀμενηνὰ κάρηνα ,
10.522 ἐλθὼν εἰς Ἰθάκην στεῖραν βοῦν , ἥ τις ἀρίστη ,
10.523 ῥέξειν ἐν μεγάροισι πυρήν τʹ ἐμπλησέμεν ἐσθλῶν ,
10.524 Τειρεσίῃ δʹ ἀπάνευθεν ὄιν ἱερευσέμεν οἴῳ
10.525 παμμέλανʹ , ὃς μήλοισι μεταπρέπει ὑμετέροισιν .
10.526 αὐτὰρ ἐπὴν εὐχῇσι λίσῃ κλυτὰ ἔθνεα νεκρῶν ,
10.527 ἔνθʹ ὄιν ἀρνειὸν ῥέζειν θῆλύν τε μέλαιναν
10.528 εἰς Ἔρεβος στρέψας , αὐτὸς δʹ ἀπονόσφι τραπέσθαι
10.529 ἱέμενος ποταμοῖο ῥοάων · ἔνθα δὲ πολλαὶ
10.530 ψυχαὶ ἐλεύσονται νεκύων κατατεθνηώτων .