Greek Reader — The Homeric Odyssey (9.360

9.360 ἀτάρ οἱ αὖτις ἐγὼ πόρον αἴθοπα οἶνον .

9.361 τρὶς μὲν ἔδωκα φέρων , τρὶς δʹ ἔκπιεν ἀφραδίῃσιν .

9.362 αὐτὰρ ἐπεὶ Κύκλωπα περὶ φρένας ἤλυθεν οἶνος ,

9.363 καὶ τότε δή μιν ἔπεσσι προσηύδων μειλιχίοισι ·

9.364 Κύκλωψ , εἰρωτᾷς μʹ ὄνομα κλυτόν , αὐτὰρ ἐγώ τοι

9.365 ἐξερέω · σὺ δέ μοι δὸς ξείνιον , ὥς περ ὑπέστης .

9.366 Οὖτις ἐμοί γʹ ὄνομα · Οὖτιν δέ με κικλήσκουσι

9.367 μήτηρ ἠδὲ πατὴρ ἠδʹ ἄλλοι πάντες ἑταῖροι .

9.368 ὣς ἐφάμην , ὁ δέ μʹ αὐτίκʹ ἀμείβετο νηλέι θυμῷ ·

9.369 Οὖτιν ἐγὼ πύματον ἔδομαι μετὰ οἷς ἑτάροισιν ,

9.370 τοὺς δʹ ἄλλους πρόσθεν · τὸ δέ τοι ξεινήιον ἔσται .

9.371 ἦ καὶ ἀνακλινθεὶς πέσεν ὕπτιος , αὐτὰρ ἔπειτα

9.372 κεῖτʹ ἀποδοχμώσας παχὺν αὐχένα , κὰδ δέ μιν ὕπνος

9.373 ᾕρει πανδαμάτωρ · φάρυγος δʹ ἐξέσσυτο οἶνος

9.374 ψωμοί τʹ ἀνδρόμεοι · ὁ δʹ ἐρεύγετο οἰνοβαρείων .

9.375 καὶ τότʹ ἐγὼ τὸν μοχλὸν ὑπὸ σποδοῦ ἤλασα πολλῆς ,

9.376 ἧος θερμαίνοιτο · ἔπεσσι δὲ πάντας ἑταίρους

9.377 θάρσυνον , μή τίς μοι ὑποδείσας ἀναδύη .

9.378 ἀλλʹ ὅτε δὴ τάχʹ ὁ μοχλὸς ἐλάινος ἐν πυρὶ μέλλεν

9.379 ἅψεσθαι , χλωρός περ ἐών , διεφαίνετο δʹ αἰνῶς ,

9.380 καὶ τότʹ ἐγὼν ἆσσον φέρον ἐκ πυρός , ἀμφὶ δʹ ἑταῖροι

9.381 ἵσταντʹ · αὐτὰρ θάρσος ἐνέπνευσεν μέγα δαίμων .

9.382 οἱ μὲν μοχλὸν ἑλόντες ἐλάινον , ὀξὺν ἐπʹ ἄκρῳ ,

9.383 ὀφθαλμῷ ἐνέρεισαν · ἐγὼ δʹ ἐφύπερθεν ἐρεισθεὶς

9.384 δίνεον , ὡς ὅτε τις τρυπῷ δόρυ νήιον ἀνὴρ

9.385 τρυπάνῳ , οἱ δέ τʹ ἔνερθεν ὑποσσείουσιν ἱμάντι

9.386 ἁψάμενοι ἑκάτερθε , τὸ δὲ τρέχει ἐμμενὲς αἰεί .

9.387 ὣς τοῦ ἐν ὀφθαλμῷ πυριήκεα μοχλὸν ἑλόντες