4.771 , οὐδέ τι οἶδεν ὅ οἱ φόνος υἷι τέτυκται .
4.772 ὣς ἄρα τις εἴπεσκε , τὰ δʹ οὐκ ἴσαν ὡς ἐτέτυκτο .
4.773 τοῖσιν δʹ Ἀντίνοος ἀγορήσατο καὶ μετέειπε ·
4.774 δαιμόνιοι , μύθους μὲν ὑπερφιάλους ἀλέασθε
4.775 πάντας ὁμῶς , μή πού τις ἀπαγγείλῃσι καὶ εἴσω .
4.776 ἀλλʹ ἄγε σιγῇ τοῖον ἀναστάντες τελέωμεν
4.777 μῦθον , ὃ δὴ καὶ πᾶσιν ἐνὶ φρεσὶν ἤραρεν ἡμῖν .
4.778 ὣς εἰπὼν ἐκρίνατʹ ἐείκοσι φῶτας ἀρίστους ,
4.779 βὰν δʹ ἰέναι ἐπὶ νῆα θοὴν καὶ θῖνα θαλάσσης .
4.780 νῆα μὲν οὖν πάμπρωτον ἁλὸς βένθοσδε ἔρυσσαν ,
4.781 ἐν δʹ ἱστόν τʹ ἐτίθεντο καὶ ἱστία νηὶ μελαίνῃ ,
4.782 ἠρτύναντο δʹ ἐρετμὰ τροποῖς ἐν δερματίνοισιν ,
4.783 πάντα κατὰ μοῖραν , ἀνά θʹ ἱστία λευκὰ πέτασσαν ·
4.784 τεύχεα δέ σφʹ ἤνεικαν ὑπέρθυμοι θεράποντες .
4.785 ὑψοῦ δʹ ἐν νοτίῳ τήν γʹ ὥρμισαν , ἐκ δʹ ἔβαν αὐτοί ·
4.786 ἔνθα δὲ δόρπον ἕλοντο , μένον δʹ ἐπὶ ἕσπερον ἐλθεῖν .
4.787 ἡ δʹ ὑπερωίῳ αὖθι περίφρων Πηνελόπεια
4.788 κεῖτʹ ἄρʹ ἄσιτος , ἄπαστος ἐδητύος ἠδὲ ποτῆτος ,
4.789 ὁρμαίνουσʹ ἤ οἱ θάνατον φύγοι υἱὸς ἀμύμων ,
4.790 ἦ ὅ γʹ ὑπὸ μνηστῆρσιν ὑπερφιάλοισι δαμείη .
4.791 ὅσσα δὲ μερμήριξε λέων ἀνδρῶν ἐν ὁμίλῳ
4.792 δείσας , ὁππότε μιν δόλιον περὶ κύκλον ἄγωσι ,
4.793 τόσσα μιν ὁρμαίνουσαν ἐπήλυθε νήδυμος ὕπνος ·
4.794 εὗδε δʹ ἀνακλινθεῖσα , λύθεν δέ οἱ ἅψεα πάντα .
4.795 ἔνθʹ αὖτʹ ἄλλʹ ἐνόησε θεά , γλαυκῶπις Ἀθήνη ·
4.796 εἴδωλον ποίησε , δέμας δʹ ἤικτο γυναικί ,
4.797 Ἰφθίμῃ , κούρῃ μεγαλήτορος Ἰκαρίοιο ,
4.798 τὴν Εὔμηλος ὄπυιε Φερῇς ἔνι οἰκία ναίων .
4.799 πέμπε δέ μιν πρὸς δώματʹ Ὀδυσσῆος θείοιο ,
4.800 ἧος Πηνελόπειαν