Greek Reader — The Homeric Odyssey (4.712

4.712 οὐκ οἶδʹ ἤ τίς μιν θεὸς ὤρορεν , ἦε καὶ αὐτοῦ

4.713 θυμὸς ἐφωρμήθη ἴμεν ἐς Πύλον , ὄφρα πύθηται

4.714 πατρὸς ἑοῦ ἢ νόστον ἢ ὅν τινα πότμον ἐπέσπεν .

4.715 ὣς ἄρα φωνήσας ἀπέβη κατὰ δῶμʹ Ὀδυσῆος .

4.716 τὴν δʹ ἄχος ἀμφεχύθη θυμοφθόρον , οὐδʹ ἄρʹ ἔτʹ ἔτλη

4.717 δίφρῳ ἐφέζεσθαι πολλῶν κατὰ οἶκον ἐόντων ,

4.718 ἀλλʹ ἄρʹ ἐπʹ οὐδοῦ ἷζε πολυκμήτου θαλάμοιο

4.719 οἴκτρʹ ὀλοφυρομένη · περὶ δὲ δμῳαὶ μινύριζον

4.720 πᾶσαι , ὅσαι κατὰ δώματʹ ἔσαν νέαι ἠδὲ παλαιαί .

4.721 τῇς δʹ ἁδινὸν γοόωσα μετηύδα Πηνελόπεια ·

4.722 κλῦτε , φίλαι · πέρι γάρ μοι Ὀλύμπιος ἄλγεʹ ἔδωκεν

4.723 ἐκ πασέων , ὅσσαι μοι ὁμοῦ τράφεν ἠδʹ ἐγένοντο ·

4.724 ἣ πρὶν μὲν πόσιν ἐσθλὸν ἀπώλεσα θυμολέοντα ,

4.725 παντοίῃς ἀρετῇσι κεκασμένον ἐν Δαναοῖσιν ,

4.726 ἐσθλόν , τοῦ κλέος εὐρὺ καθʹ Ἑλλάδα καὶ μέσον Ἄργος .

4.727 νῦν αὖ παῖδʹ ἀγαπητὸν ἀνηρείψαντο θύελλαι

4.728 ἀκλέα ἐκ μεγάρων , οὐδʹ ὁρμηθέντος ἄκουσα .

4.729 σχέτλιαι , οὐδʹ ὑμεῖς περ ἐνὶ φρεσὶ θέσθε ἑκάστη

4.730 ἐκ λεχέων μʹ ἀνεγεῖραι , ἐπιστάμεναι σάφα θυμῷ ,

4.731 ὁππότʹ ἐκεῖνος ἔβη κοίλην ἐπὶ νῆα μέλαιναν .

4.732 εἰ γὰρ ἐγὼ πυθόμην ταύτην ὁδὸν ὁρμαίνοντα ,

4.733 τῷ κε μάλʹ ἤ κεν ἔμεινε καὶ ἐσσύμενός περ ὁδοῖο ,

4.734 ἤ κέ με τεθνηκυῖαν ἐνὶ μεγάροισιν ἔλειπεν .

4.735 ἀλλά τις ὀτρηρῶς Δολίον καλέσειε γέροντα ,

4.736 δμῶʹ ἐμόν , ὅν μοι δῶκε πατὴρ ἔτι δεῦρο κιούσῃ ,

4.737 καί μοι κῆπον ἔχει πολυδένδρεον , ὄφρα τάχιστα

4.738 Λαέρτῃ τάδε πάντα παρεζόμενος καταλέξῃ ,

4.739 εἰ δή πού τινα κεῖνος ἐνὶ φρεσὶ μῆτιν ὑφήνας

4.740 ἐξελθὼν λαοῖσιν ὀδύρεται , οἳ μεμάασιν

4.741 ὃν καὶ Ὀδυσσῆος φθῖσαι γόνον ἀντιθέοιο