3.384 κέρασιν περιχεύας .
3.385 ὣς ἔφατʹ εὐχόμενος , τοῦ δʹ ἔκλυε Παλλὰς Ἀθήνη .
3.386 τοῖσιν δʹ ἡγεμόνευε Γερήνιος ἱππότα Νέστωρ ,
3.387 υἱάσι καὶ γαμβροῖσιν , ἑὰ πρὸς δώματα καλά .
3.388 ἀλλʹ ὅτε δώμαθʹ ἵκοντο ἀγακλυτὰ τοῖο ἄνακτος ,
3.389 ἑξείης ἕζοντο κατὰ κλισμούς τε θρόνους τε ·
3.390 τοῖς δʹ ὁ γέρων ἐλθοῦσιν ἀνὰ κρητῆρα κέρασσεν
3.391 οἴνου ἡδυπότοιο , τὸν ἑνδεκάτῳ ἐνιαυτῷ
3.392 ὤιξεν ταμίη καὶ ἀπὸ κρήδεμνον ἔλυσε ·
3.393 τοῦ ὁ γέρων κρητῆρα κεράσσατο , πολλὰ δʹ Ἀθήνῃ
3.394 εὔχετʹ ἀποσπένδων , κούρῃ Διὸς αἰγιόχοιο .
3.395 αὐτὰρ ἐπεὶ σπεῖσάν τʹ ἔπιον θʹ , ὅσον ἤθελε θυμός ,
3.396 οἱ μὲν κακκείοντες ἔβαν οἶκόνδε ἕκαστος ,
3.397 τὸν δʹ αὐτοῦ κοίμησε Γερήνιος ἱππότα Νέστωρ ,
3.398 Τηλέμαχον , φίλον υἱὸν Ὀδυσσῆος θείοιο ,
3.399 τρητοῖς ἐν λεχέεσσιν ὑπʹ αἰθούσῃ ἐριδούπῳ ,
3.400 πὰρʹ δʹ ἄρʹ ἐυμμελίην Πεισίστρατον , ὄρχαμον ἀνδρῶν ,
3.401 ὅς οἱ ἔτʹ ἠίθεος παίδων ἦν ἐν μεγάροισιν ·
3.402 αὐτὸς δʹ αὖτε καθεῦδε μυχῷ δόμου ὑψηλοῖο ,
3.403 τῷ δʹ ἄλοχος δέσποινα λέχος πόρσυνε καὶ εὐνήν .
3.404 ἦμος δʹ ἠριγένεια φάνη ῥοδοδάκτυλος Ἠώς ,
3.405 ὤρνυτʹ ἄρʹ ἐξ εὐνῆφι Γερήνιος ἱππότα Νέστωρ ,
3.406 ἐκ δʹ ἐλθὼν κατʹ ἄρʹ ἕζετʹ ἐπὶ ξεστοῖσι λίθοισιν ,
3.407 οἵ οἱ ἔσαν προπάροιθε θυράων ὑψηλάων ,
3.408 λευκοί , ἀποστίλβοντες ἀλείφατος · οἷς ἔπι μὲν πρὶν
3.409 Νηλεὺς ἵζεσκεν , θεόφιν μήστωρ ἀτάλαντος ·
3.410 ἀλλʹ ὁ μὲν ἤδη κηρὶ δαμεὶς Ἄϊδόσδε βεβήκει ,
3.411 Νέστωρ αὖ τότʹ ἐφῖζε Γερήνιος , οὖρος Ἀχαιῶν ,
3.412 σκῆπτρον ἔχων . περὶ δʹ υἷες ἀολλέες ἠγερέθοντο
3.413 ἐκ θαλάμων ἐλθόντες , Ἐχέφρων τε Στρατίος τε
3.414 Περσεύς τʹ Ἄρητός τε καὶ ἀντίθεος Θρασυμήδης .
3.415 τοῖσι δʹ ἔπειθʹ