Greek Reader — Plutarch, Life of Alexander (1.head–1.3)

Plutarch, Life of Alexander 1.head–1.3

1.head Ἀλέξανδρος

1.1 τὸν Ἀλεξάνδρου τοῦ βασιλέως βίον καὶ τοῦ Καίσαρος , ὑφ’ οὗ κατελύθη Πομπήϊος , ἐν τούτῳ τῷ βιβλίῳ γράφοντες , διὰ τὸ πλῆθος τῶν ὑποκειμένων πράξεων οὐδὲν ἄλλο προεροῦμεν ἢ παραιτησόμεθα τοὺς ἀναγινώσκοντας , ἐὰν μὴ πάντα μηδὲ καθ’ ἕκαστον ἐξειργασμένως τι τῶν περιβοήτων ἀπαγγέλλωμεν , ἀλλὰ ἐπιτέμνοντες τὰ πλεῖστα , μὴ συκοφαντεῖν .

1.2 οὔτε γὰρ ἱστορίας γράφομεν , ἀλλὰ βίους , οὔτε ταῖς ἐπιφανεστάταις πράξεσι πάντως ἔνεστι δήλωσις ἀρετῆς ἢ κακίας , ἀλλὰ πρᾶγμα βραχὺ πολλάκις καὶ ῥῆμα καὶ παιδιά τις ἔμφασιν ἤθους ἐποίησε μᾶλλον ἢ μάχαι μυριόνεκροι καὶ παρατάξεις αἱ μέγισται καὶ πολιορκίαι πόλεων .

1.3 ὥσπερ οὖν οἱ ζῳγράφοι τὰς ὁμοιότητας ἀπὸ τοῦ προσώπου καὶ τῶν περὶ τὴν ὄψιν εἰδῶν , οἷς ἐμφαίνεται τὸ ἦθος , ἀναλαμβάνουσιν , ἐλάχιστα τῶν λοιπῶν μερῶν φροντίζοντες , οὕτως ἡμῖν δοτέον εἰς τὰ τῆς ψυχῆς σημεῖα μᾶλλον ἐνδύεσθαι καὶ διὰ τούτων εἰδοποιεῖν τὸν ἑκάστου βίον , ἐάσαντας ἑτέροις τὰ μεγέθη καὶ τοὺς ἀγῶνας .