16.442 καὶ ἐμὲ πτολίπορθος Ὀδυσσεὺς
16.443 πολλάκι γούνασιν οἷσιν ἐφεσσάμενος κρέας ὀπτὸν
16.444 ἐν χείρεσσιν ἔθηκεν , ἐπέσχε τε οἶνον ἐρυθρόν .
16.445 τῷ μοι Τηλέμαχος πάντων πολὺ φίλτατός ἐστιν
16.446 ἀνδρῶν , οὐδέ τί μιν θάνατον τρομέεσθαι ἄνωγα
16.447 ἔκ γε μνηστήρων · θεόθεν δʹ οὐκ ἔστʹ ἀλέασθαι .
16.448 ὣς φάτο θαρσύνων , τῷ δʹ ἤρτυεν αὐτὸς ὄλεθρον .
16.449 ἡ μὲν ἄρʹ εἰσαναβᾶσʹ ὑπερώϊα σιγαλόεντα
16.450 κλαῖεν ἔπειτʹ Ὀδυσῆα , φίλον πόσιν , ὄφρα οἱ ὕπνον
16.451 ἡδὺν ἐπὶ βλεφάροισι βάλε γλαυκῶπις Ἀθήνη .
16.452 ἑσπέριος δʹ Ὀδυσῆϊ καὶ υἱέϊ δῖος ὑφορβὸς
16.453 ἤλυθεν · οἱ δʹ ἄρα δόρπον ἐπισταδὸν ὡπλίζοντο ,
16.454 σῦν ἱερεύσαντες ἐνιαύσιον . αὐτὰρ Ἀθήνη ,
16.455 ἄγχι παρισταμένη , Λαερτιάδην Ὀδυσῆα
16.456 ῥάβδῳ πεπληγυῖα πάλιν ποίησε γέροντα ,
16.457 λυγρὰ δὲ εἵματα ἕσσε περὶ χροΐ , μή ἑ συβώτης
16.458 γνοίη ἐσάντα ἰδὼν καὶ ἐχέφρονι Πηνελοπείῃ
16.459 ἔλθοι ἀπαγγέλλων μηδὲ φρεσὶν εἰρύσσαιτο .
16.460 τὸν καὶ Τηλέμαχος πρότερος πρὸς μῦθον ἔειπεν ·
16.461 ἦλθες , δῖʹ Εὔμαιε . τί δὴ κλέος ἔστʹ ἀνὰ ἄστυ ;
16.462 ἦ ῥʹ ἤδη μνηστῆρες ἀγήνορες ἔνδον ἔασιν
16.463 ἐκ λόχου , ἦ ἔτι μʹ αὖτʹ εἰρύαται οἴκαδʹ ἰόντα ;
16.464 τὸν δʹ ἀπαμειβόμενος προσέφης , Εὔμαιε συβῶτα ·
16.465 οὐκ ἔμελέν μοι ταῦτα μεταλλῆσαι καὶ ἐρέσθαι
16.466 ἄστυ καταβλώσκοντα · τάχιστά με θυμὸς ἀνώγει
16.467 ἀγγελίην εἰπόντα πάλιν δεῦρʹ ἀπονέεσθαι .
16.468 ὡμήρησε δέ μοι παρʹ ἑταίρων ἄγγελος ὠκύς ,
16.469 κῆρυξ , ὃς δὴ πρῶτος ἔπος σῇ μητρὶ ἔειπεν .
16.470 ἄλλο δέ τοι τό γε οἶδα · τὸ γὰρ ἴδον ὀφθαλμοῖσιν .
16.471 ἤδη ὑπὲρ πόλιος , ὅθι θʹ Ἕρμαιος λόφος ἐστίν ,
16.472 ἦα κιών , ὅτε νῆα θοὴν ἰδόμην κατιοῦσαν
16.473 ἐς λιμένʹ ἡμέτερον