11.482 γῆς ἐπέβην , ἀλλʹ αἰὲν ἔχω κακά . σεῖο δʹ , Ἀχιλλεῦ ,
11.483 οὔ τις ἀνὴρ προπάροιθε μακάρτατος οὔτʹ ἄρʹ ὀπίσσω .
11.484 πρὶν μὲν γάρ σε ζωὸν ἐτίομεν ἶσα θεοῖσιν
11.485 Ἀργεῖοι , νῦν αὖτε μέγα κρατέεις νεκύεσσιν
11.486 ἐνθάδʹ ἐών · τῷ μή τι θανὼν ἀκαχίζευ , Ἀχιλλεῦ .
11.487 ὣς ἐφάμην , ὁ δέ μʹ αὐτίκʹ ἀμειβόμενος προσέειπε ·
11.488 μὴ δή μοι θάνατόν γε παραύδα , φαίδιμʹ Ὀδυσσεῦ .
11.489 βουλοίμην κʹ ἐπάρουρος ἐὼν θητευέμεν ἄλλῳ ,
11.490 ἀνδρὶ παρʹ ἀκλήρῳ , ᾧ μὴ βίοτος πολὺς εἴη ,
11.491 ἢ πᾶσιν νεκύεσσι καταφθιμένοισιν ἀνάσσειν .
11.492 ἀλλʹ ἄγε μοι τοῦ παιδὸς ἀγαυοῦ μῦθον ἐνίσπες ,
11.493 ἢ ἕπετʹ ἐς πόλεμον πρόμος ἔμμεναι , ἦε καὶ οὐκί .
11.494 εἰπὲ δέ μοι Πηλῆος ἀμύμονος , εἴ τι πέπυσσαι ,
11.495 ἢ ἔτʹ ἔχει τιμὴν πολέσιν μετὰ Μυρμιδόνεσσιν ,
11.496 ἦ μιν ἀτιμάζουσιν ἀνʹ Ἑλλάδα τε Φθίην τε ,
11.497 οὕνεκά μιν κατὰ γῆρας ἔχει χεῖράς τε πόδας τε .
11.498 οὐ γὰρ ἐγὼν ἐπαρωγὸς ὑπʹ αὐγὰς ἠελίοιο ,
11.499 τοῖος ἐών , οἷός ποτʹ ἐνὶ Τροίῃ εὐρείῃ
11.500 πέφνον λαὸν ἄριστον , ἀμύνων Ἀργείοισιν ·
11.501 εἰ τοιόσδʹ ἔλθοιμι μίνυνθά περ ἐς πατέρος δῶ ·
11.502 τῷ κέ τεῳ στύξαιμι μένος καὶ χεῖρας ἀάπτους ,
11.503 οἳ κεῖνον βιόωνται ἐέργουσίν τʹ ἀπὸ τιμῆς .
11.504 ὣς ἔφατʹ , αὐτὰρ ἐγώ μιν ἀμειβόμενος προσέειπον ·
11.505 ἦ τοι μὲν Πηλῆος ἀμύμονος οὔ τι πέπυσμαι ,
11.506 αὐτάρ τοι παιδός γε Νεοπτολέμοιο φίλοιο
11.507 πᾶσαν ἀληθείην μυθήσομαι , ὥς με κελεύεις ·
11.508 αὐτὸς γάρ μιν ἐγὼ κοίλης ἐπὶ νηὸς ἐίσης
11.509 ἤγαγον ἐκ Σκύρου μετʹ ἐυκνήμιδας Ἀχαιούς .
11.510 ἦ τοι ὅτʹ ἀμφὶ πόλιν Τροίην