11.333 πάντες ἀκὴν ἐγένοντο σιωπῇ ,
11.334 κηληθμῷ δʹ ἔσχοντο κατὰ μέγαρα σκιόεντα .
11.335 τοῖσιν δʹ Ἀρήτη λευκώλενος ἤρχετο μύθων .
11.336 Φαίηκες , πῶς ὔμμιν ἀνὴρ ὅδε φαίνεται εἶναι
11.337 εἶδός τε μέγεθός τε ἰδὲ φρένας ἔνδον ἐίσας ;
11.338 ξεῖνος δʹ αὖτʹ ἐμός ἐστιν , ἕκαστος δʹ ἔμμορε τιμῆς ·
11.339 τῷ μὴ ἐπειγόμενοι ἀποπέμπετε , μηδὲ τὰ δῶρα
11.340 οὕτω χρηίζοντι κολούετε · πολλὰ γὰρ ὑμῖν
11.341 κτήματʹ ἐνὶ μεγάροισι θεῶν ἰότητι κέονται .
11.342 τοῖσι δὲ καὶ μετέειπε γέρων ἥρως Ἐχένηος ,
11.343 ὃς δὴ Φαιήκων ἀνδρῶν προγενέστερος ἦεν ·
11.344 ὦ φίλοι , οὐ μὰν ἧμιν ἀπὸ σκοποῦ οὐδʹ ἀπὸ δόξης
11.345 μυθεῖται βασίλεια περίφρων · ἀλλὰ πίθεσθε .
11.346 Ἀλκινόου δʹ ἐκ τοῦδʹ ἔχεται ἔργον τε ἔπος τε .
11.347 τὸν δʹ αὖτʹ Ἀλκίνοος ἀπαμείβετο φώνησέν τε ·
11.348 τοῦτο μὲν οὕτω δὴ ἔσται ἔπος , αἴ κεν ἐγώ γε
11.349 ζωὸς Φαιήκεσσι φιληρέτμοισιν ἀνάσσω ·
11.350 ξεῖνος δὲ τλήτω μάλα περ νόστοιο χατίζων
11.351 ἔμπης οὖν ἐπιμεῖναι ἐς αὔριον , εἰς ὅ κε πᾶσαν
11.352 δωτίνην τελέσω · πομπὴ δʹ ἄνδρεσσι μελήσει
11.353 πᾶσι , μάλιστα δʹ ἐμοί · τοῦ γὰρ κράτος ἔστʹ ἐνὶ δήμῳ .
11.354 τὸν δʹ ἀπαμειβόμενος προσέφη πολύμητις Ὀδυσσεύς ·
11.355 Ἀλκίνοε κρεῖον , πάντων ἀριδείκετε λαῶν ,
11.356 εἴ με καὶ εἰς ἐνιαυτὸν ἀνώγοιτʹ αὐτόθι μίμνειν ,
11.357 πομπὴν δʹ ὀτρύνοιτε καὶ ἀγλαὰ δῶρα διδοῖτε ,
11.358 καὶ κε τὸ βουλοίμην , καί κεν πολὺ κέρδιον εἴη ,
11.359 πλειοτέρῃ σὺν χειρὶ φίλην ἐς πατρίδʹ ἱκέσθαι ·
11.360 καί κʹ αἰδοιότερος καὶ φίλτερος ἀνδράσιν εἴην
11.361 πᾶσιν , ὅσοι μʹ Ἰθάκηνδε ἰδοίατο νοστήσαντα .
11.362 τὸν δʹ αὖτʹ Ἀλκίνοος ἀπαμείβετο φώνησέν τε ·
11.363 ὦ Ὀδυσεῦ , τὸ