10.382 αὐτὰρ ἐγώ μιν ἀμειβόμενος προσέειπον ·
10.383 ὦ Κίρκη , τίς γάρ κεν ἀνήρ , ὃς ἐναίσιμος εἴη ,
10.384 πρὶν τλαίη πάσσασθαι ἐδητύος ἠδὲ ποτῆτος ,
10.385 πρὶν λύσασθʹ ἑτάρους καὶ ἐν ὀφθαλμοῖσιν ἰδέσθαι ;
10.386 ἀλλʹ εἰ δὴ πρόφρασσα πιεῖν φαγέμεν τε κελεύεις ,
10.387 λῦσον , ἵνʹ ὀφθαλμοῖσιν ἴδω ἐρίηρας ἑταίρους .
10.388 ὣς ἐφάμην , Κίρκη δὲ διὲκ μεγάροιο βεβήκει
10.389 ῥάβδον ἔχουσʹ ἐν χειρί , θύρας δʹ ἀνέῳξε συφειοῦ ,
10.390 ἐκ δʹ ἔλασεν σιάλοισιν ἐοικότας ἐννεώροισιν .
10.391 οἱ μὲν ἔπειτʹ ἔστησαν ἐναντίοι , ἡ δὲ διʹ αὐτῶν
10.392 ἐρχομένη προσάλειφεν ἑκάστῳ φάρμακον ἄλλο .
10.393 τῶν δʹ ἐκ μὲν μελέων τρίχες ἔρρεον , ἃς πρὶν ἔφυσε
10.394 φάρμακον οὐλόμενον , τό σφιν πόρε πότνια Κίρκη ·
10.395 ἄνδρες δʹ ἂψ ἐγένοντο νεώτεροι ἢ πάρος ἦσαν ,
10.396 καὶ πολὺ καλλίονες καὶ μείζονες εἰσοράασθαι .
10.397 ἔγνωσαν δέ μʹ ἐκεῖνοι ἔφυν τʹ ἐν χερσὶν ἕκαστος .
10.398 πᾶσιν δʹ ἱμερόεις ὑπέδυ γόος , ἀμφὶ δὲ δῶμα
10.399 σμερδαλέον κονάβιζε · θεὰ δʹ ἐλέαιρε καὶ αὐτή .
10.400 ἡ δέ μευ ἄγχι στᾶσα προσηύδα δῖα θεάων ·
10.401 διογενὲς Λαερτιάδη , πολυμήχανʹ Ὀδυσσεῦ ,
10.402 ἔρχεο νῦν ἐπὶ νῆα θοὴν καὶ θῖνα θαλάσσης .
10.403 νῆα μὲν ἂρ πάμπρωτον ἐρύσσατε ἤπειρόνδε ,
10.404 κτήματα δʹ ἐν σπήεσσι πελάσσατε ὅπλα τε πάντα ·
10.405 αὐτὸς δʹ ἂψ ἰέναι καὶ ἄγειν ἐρίηρας ἑταίρους .
10.406 ὣς ἔφατʹ , αὐτὰρ ἐμοί γʹ ἐπεπείθετο θυμὸς ἀγήνωρ ,
10.407 βῆν δʹ ἰέναι ἐπὶ νῆα θοὴν καὶ θῖνα θαλάσσης .
10.408 εὗρον ἔπειτʹ ἐπὶ νηὶ θοῇ ἐρίηρας ἑταίρους
10.409 οἴκτρʹ ὀλοφυρομένους , θαλερὸν κατὰ δάκρυ χέοντας .
10.410 ὡς δʹ ὅτʹ ἂν ἄγραυλοι πόριες περὶ βοῦς ἀγελαίας ,
10.411 ἐλθούσας