4.422 δὴ σχέσθαι τε βίης λῦσαί τε γέροντα ,
4.423 ἥρως , εἴρεσθαι δέ , θεῶν ὅς τίς σε χαλέπτει ,
4.424 νόστον θʹ , ὡς ἐπὶ πόντον ἐλεύσεαι ἰχθυόεντα .
4.425 ὣς εἰποῦσʹ ὑπὸ πόντον ἐδύσετο κυμαίνοντα .
4.426 αὐτὰρ ἐγὼν ἐπὶ νῆας , ὅθʹ ἕστασαν ἐν ψαμάθοισιν ,
4.427 ἤια · πολλὰ δέ μοι κραδίη πόρφυρε κιόντι .
4.428 αὐτὰρ ἐπεί ῥʹ ἐπὶ νῆα κατήλυθον ἠδὲ θάλασσαν ,
4.429 δόρπον θʹ ὁπλισάμεσθʹ , ἐπί τʹ ἤλυθεν ἀμβροσίη νύξ ·
4.430 δὴ τότε κοιμήθημεν ἐπὶ ῥηγμῖνι θαλάσσης .
4.431 ἦμος δʹ ἠριγένεια φάνη ῥοδοδάκτυλος Ἠώς ,
4.432 καὶ τότε δὴ παρὰ θῖνα θαλάσσης εὐρυπόροιο
4.433 ἤια πολλὰ θεοὺς γουνούμενος · αὐτὰρ ἑταίρους
4.434 τρεῖς ἄγον , οἷσι μάλιστα πεποίθεα πᾶσαν ἐπʹ ἰθύν .
4.435 τόφρα δʹ ἄρʹ ἥ γʹ ὑποδῦσα θαλάσσης εὐρέα κόλπον
4.436 τέσσαρα φωκάων ἐκ πόντου δέρματʹ ἔνεικε ·
4.437 πάντα δʹ ἔσαν νεόδαρτα · δόλον δʹ ἐπεμήδετο πατρί .
4.438 εὐνὰς δʹ ἐν ψαμάθοισι διαγλάψασʹ ἁλίῃσιν
4.439 ἧστο μένουσʹ · ἡμεῖς δὲ μάλα σχεδὸν ἤλθομεν αὐτῆς ·
4.440 ἑξείης δʹ εὔνησε , βάλεν δʹ ἐπὶ δέρμα ἑκάστῳ .
4.441 ἔνθα κεν αἰνότατος λόχος ἔπλετο · τεῖρε γὰρ αἰνῶς
4.442 φωκάων ἁλιοτρεφέων ὀλοώτατος ὀδμή ·
4.443 τίς γάρ κʹ εἰναλίῳ παρὰ κήτεϊ κοιμηθείη ;
4.444 ἀλλʹ αὐτὴ ἐσάωσε καὶ ἐφράσατο μέγʹ ὄνειαρ ·
4.445 ἀμβροσίην ὑπὸ ῥῖνα ἑκάστῳ θῆκε φέρουσα
4.446 ἡδὺ μάλα πνείουσαν , ὄλεσσε δὲ κήτεος ὀδμήν .
4.447 πᾶσαν δʹ ἠοίην μένομεν τετληότι θυμῷ ·
4.448 φῶκαι δʹ ἐξ ἁλὸς ἦλθον ἀολλέες . αἱ μὲν ἔπειτα
4.449 ἑξῆς εὐνάζοντο παρὰ ῥηγμῖνι θαλάσσης ·
4.450 ἔνδιος δʹ ὁ γέρων ἦλθʹ ἐξ ἁλός , εὗρε δὲ φώκας
4.451 ζατρεφέας , πάσας δʹ ἄρʹ ἐπῴχετο , λέκτο