3.328 ἐρέει · μάλα γὰρ πεπνυμένος ἐστίν .
3.329 ὣς ἔφατʹ , ἠέλιος δʹ ἄρʹ ἔδυ καὶ ἐπὶ κνέφας ἦλθε .
3.330 τοῖσι δὲ καὶ μετέειπε θεά , γλαυκῶπις Ἀθήνη ·
3.331 ὦ γέρον , ἦ τοι ταῦτα κατὰ μοῖραν κατέλεξας ·
3.332 ἀλλʹ ἄγε τάμνετε μὲν γλώσσας , κεράασθε δὲ οἶνον ,
3.333 ὄφρα Ποσειδάωνι καὶ ἄλλοις ἀθανάτοισιν
3.334 σπείσαντες κοίτοιο μεδώμεθα · τοῖο γὰρ ὥρη .
3.335 ἤδη γὰρ φάος οἴχεθʹ ὑπὸ ζόφον , οὐδὲ ἔοικεν ·
3.336 δηθὰ θεῶν ἐν δαιτὶ θαασσέμεν , ἀλλὰ νέεσθαι .
3.337 ἦ ῥα Διὸς θυγάτηρ , οἱ δʹ ἔκλυον αὐδησάσης .
3.338 τοῖσι δὲ κήρυκες μὲν ὕδωρ ἐπὶ χεῖρας ἔχευαν ,
3.339 κοῦροι δὲ κρητῆρας ἐπεστέψαντο ποτοῖο ,
3.340 νώμησαν δʹ ἄρα πᾶσιν ἐπαρξάμενοι δεπάεσσι ·
3.341 γλώσσας δʹ ἐν πυρὶ βάλλον , ἀνιστάμενοι δʹ ἐπέλειβον .
3.342 αὐτὰρ ἐπεὶ σπεῖσάν τʹ ἔπιον θʹ , ὅσον ἤθελε θυμός ,
3.343 δὴ τότʹ Ἀθηναίη καὶ Τηλέμαχος θεοειδὴς
3.344 ἄμφω ἱέσθην κοίλην ἐπὶ νῆα νέεσθαι .
3.345 Νέστωρ δʹ αὖ κατέρυκε καθαπτόμενος ἐπέεσσιν ·
3.346 Ζεὺς τό γʹ ἀλεξήσειε καὶ ἀθάνατοι θεοὶ ἄλλοι ,
3.347 ὡς ὑμεῖς παρʹ ἐμεῖο θοὴν ἐπὶ νῆα κίοιτε
3.348 ὥς τέ τευ ἦ παρὰ πάμπαν ἀνείμονος ἠδὲ πενιχροῦ ,
3.349 ᾧ οὔ τι χλαῖναι καὶ ῥήγεα πόλλʹ ἐνὶ οἴκῳ ,
3.350 οὔτʹ αὐτῷ μαλακῶς οὔτε ξείνοισιν ἐνεύδειν .
3.351 αὐτὰρ ἐμοὶ πάρα μὲν χλαῖναι καὶ ῥήγεα καλά .
3.352 οὔ θην δὴ τοῦδʹ ἀνδρὸς Ὀδυσσῆος φίλος υἱὸς
3.353 νηὸς ἐπʹ ἰκριόφιν καταλέξεται , ὄφρʹ ἂν ἐγώ γε
3.354 ζώω , ἔπειτα δὲ παῖδες ἐνὶ μεγάροισι λίπωνται ,
3.355 ξείνους ξεινίζειν , ὅς τίς κʹ ἐμὰ δώμαθʹ ἵκηται .
3.356 τὸν δʹ αὖτε προσέειπε θεά , γλαυκῶπις Ἀθήνη