2.407 ἠδὲ θάλασσαν ,
2.408 εὗρον ἔπειτʹ ἐπὶ θινὶ κάρη κομόωντας ἑταίρους .
2.409 τοῖσι δὲ καὶ μετέειφʹ ἱερὴ ἲς Τηλεμάχοιο ·
2.410 δεῦτε , φίλοι , ἤια φερώμεθα · πάντα γὰρ ἤδη
2.411 ἁθρόʹ ἐνὶ μεγάρῳ . μήτηρ δʹ ἐμὴ οὔ τι πέπυσται ,
2.412 οὐδʹ ἄλλαι δμωαί , μία δʹ οἴη μῦθον ἄκουσεν .
2.413 ὣς ἄρα φωνήσας ἡγήσατο , τοὶ δʹ ἅμʹ ἕποντο .
2.414 οἱ δʹ ἄρα πάντα φέροντες ἐυσσέλμῳ ἐπὶ νηὶ
2.415 κάτθεσαν , ὡς ἐκέλευσεν Ὀδυσσῆος φίλος υἱός .
2.416 ἂν δʹ ἄρα Τηλέμαχος νηὸς βαῖνʹ , ἦρχε δʹ Ἀθήνη ,
2.417 νηὶ δʹ ἐνὶ πρυμνῇ κατʹ ἄρʹ ἕζετο · ἄγχι δʹ ἄρʹ αὐτῆς
2.418 ἕζετο Τηλέμαχος . τοὶ δὲ πρυμνήσιʹ ἔλυσαν ,
2.419 ἂν δὲ καὶ αὐτοὶ βάντες ἐπὶ κληῖσι καθῖζον .
2.420 τοῖσιν δʹ ἴκμενον οὖρον ἵει γλαυκῶπις Ἀθήνη ,
2.421 ἀκραῆ Ζέφυρον , κελάδοντʹ ἐπὶ οἴνοπα πόντον .
2.422 Τηλέμαχος δʹ ἑτάροισιν ἐποτρύνας ἐκέλευσεν
2.423 ὅπλων ἅπτεσθαι · τοὶ δʹ ὀτρύνοντος ἄκουσαν .
2.424 ἱστὸν δʹ εἰλάτινον κοίλης ἔντοσθε μεσόδμης
2.425 στῆσαν ἀείραντες , κατὰ δὲ προτόνοισιν ἔδησαν ,
2.426 ἕλκον δʹ ἱστία λευκὰ ἐυστρέπτοισι βοεῦσιν .
2.427 ἔπρησεν δʹ ἄνεμος μέσον ἱστίον , ἀμφὶ δὲ κῦμα
2.428 στείρῃ πορφύρεον μεγάλʹ ἴαχε νηὸς ἰούσης ·
2.429 ἡ δʹ ἔθεεν κατὰ κῦμα διαπρήσσουσα κέλευθον .
2.430 δησάμενοι δʹ ἄρα ὅπλα θοὴν ἀνὰ νῆα μέλαιναν
2.431 στήσαντο κρητῆρας ἐπιστεφέας οἴνοιο ,
2.432 λεῖβον δʹ ἀθανάτοισι θεοῖς αἰειγενέτῃσιν ,
2.433 ἐκ πάντων δὲ μάλιστα Διὸς γλαυκώπιδι κούρῃ .
2.434 παννυχίη μέν ῥʹ ἥ γε καὶ ἠῶ πεῖρε κέλευθον .