14.466 καί τι ἔπος προέηκεν ὅ περ τ’ ἄρρητον ἄμεινον .
14.467 ἀλλ’ ἐπεὶ οὖν τὸ πρῶτον ἀνέκραγον , οὐκ ἐπικεύσω .
14.468 εἴθ’ ὣς ἡβώοιμι βίη τέ μοι ἔμπεδος εἴη ,
14.469 ὡς ὅθ’ ὑπὸ Τροίην λόχον ἤγομεν ἀρτύναντες .
14.470 ἡγείσθην δ’ Ὀδυσεύς τε καὶ Ἀτρεΐδης Μενέλαος ,
14.471 τοῖσι δ’ ἅμα τρίτος ἄρχον ἐγών · αὐτοὶ γὰρ ἄνωγον .
14.472 ἀλλ’ ὅτε δή ῥ’ ἱκόμεσθα ποτὶ πτόλιν αἰπύ τε τεῖχος ,
14.473 ἡμεῖς μὲν περὶ ἄστυ κατὰ ῥωπήϊα πυκνά ,
14.474 ἂν δόνακας καὶ ἕλος , ὑπὸ τεύχεσι πεπτηῶτες
14.475 κείμεθα . νὺξ δ’ ἄρ’ ἐπῆλθε κακὴ Βορέαο πεσόντος ,
14.476 πηγυλίς · αὐτὰρ ὕπερθε χιὼν γένετ’ ἠΰτε πάχνη ,
14.477 ψυχρή , καὶ σακέεσσι περιτρέφετο κρύσταλλος .
14.478 ἔνθ’ ἄλλοι πάντες χλαίνας ἔχον ἠδὲ χιτῶνας ,
14.479 εὗδον δ’ εὔκηλοι , σάκεσιν εἰλυμένοι ὤμους ·
14.480 αὐτὰρ ἐγὼ χλαῖναν μὲν ἰὼν ἑτάροισιν ἔλειπον
14.481 ἀφραδίῃς , ἐπεὶ οὐκ ἐφάμην ῥιγωσέμεν ἔμπης ,
14.482 ἀλλ’ ἑπόμην σάκος οἶον ἔχων καὶ ζῶμα φαεινόν .
14.483 ἀλλ’ ὅτε δὴ τρίχα νυκτὸς ἔην , μετὰ δ’ ἄστρα βεβήκει ,
14.484 καὶ τότ’ ἐγὼν Ὀδυσῆα προσηύδων ἐγγὺς ἐόντα
14.485 ἀγκῶνι νύξας · ὁ δ’ ἄρ’ ἐμμαπέως ὑπάκουσε ·
14.486 διογενὲς Λαερτιάδη , πολυμήχαν’ Ὀδυσσεῦ ,
14.487 οὔ τοι ἔτι ζωοῖσι μετέσσομαι , ἀλλά με χεῖμα
14.488 δάμναται · οὐ γὰρ ἔχω χλαῖναν · παρά μ’ ἤπαφε δαίμων
14.489 οἰοχίτων’ ἔμεναι · νῦν δ’ οὐκέτι φυκτὰ πέλονται .
14.490 ὣς ἐφάμην , ὁ δ’ ἔπειτα νόον σχέθε τόνδ’ ἐνὶ θυμῷ ,
14.491 οἷος κεῖνος ἔην βουλευέμεν ἠδὲ μάχεσθαι ·
14.492 φθεγξάμενος δ’ ὀλίγῃ ὀπί με πρὸς μῦθον ἔειπε ·
14.493 σίγα νῦν , μή τίς σευ Ἀχαιῶν ἄλλος ἀκούσῃ .