16.321 μὲν τοιαῦτα πρὸς ἀλλήλους ἀγόρευον ,
16.322 ἡ δʹ ἄρʹ ἔπειτʹ Ἰθάκηνδε κατήγετο νηῦς εὐεργής ,
16.323 ἣ φέρε Τηλέμαχον Πυλόθεν καὶ πάντας ἑταίρους .
16.324 οἱ δʹ ὅτε δὴ λιμένος πολυβενθέος ἐντὸς ἵκοντο ,
16.325 νῆα μὲν οἵ γε μέλαιναν ἐπʹ ἠπείροιο ἔρυσσαν ,
16.326 τεύχεα δέ σφʹ ἀπένεικαν ὑπέρθυμοι θεράποντες ,
16.327 αὐτίκα δʹ ἐς Κλυτίοιο φέρον περικαλλέα δῶρα .
16.328 αὐτὰρ κήρυκα πρόεσαν δόμον εἰς Ὀδυσῆος ,
16.329 ἀγγελίην ἐρέοντα περίφρονι Πηνελοπείῃ ,
16.330 οὕνεκα Τηλέμαχος μὲν ἐπʹ ἀγροῦ , νῆα δʹ ἀνώγει
16.331 ἄστυδʹ ἀποπλείειν , ἵνα μὴ δείσασʹ ἐνὶ θυμῷ
16.332 ἰφθίμη βασίλεια τέρεν κατὰ δάκρυον εἴβοι
16.333 τὼ δὲ συναντήτην κῆρυξ καὶ δῖος ὑφορβὸς
16.334 τῆς αὐτῆς ἕνεκʹ ἀγγελίης , ἐρέοντε γυναικί .
16.335 ἀλλʹ ὅτε δή ῥʹ ἵκοντο δόμον θείου βασιλῆος ,
16.336 κῆρυξ μέν ῥα μέσῃσι μετὰ δμῳῇσιν ἔειπεν ·
16.337 ἤδη τοι , βασίλεια , φίλος πάϊς εἰλήλουθε .
16.338 Πηνελοπείῃ δʹ εἶπε συβώτης ἄγχι παραστὰς
16.339 πάνθʹ ὅσα οἱ φίλος υἱὸς ἀνώγει μυθήσασθαι .
16.340 αὐτὰρ ἐπεὶ δὴ πᾶσαν ἐφημοσύνην ἀπέειπε ,
16.341 βῆ ῥʹ ἴμεναι μεθʹ ὕας , λίπε δʹ ἕρκεά τε μέγαρόν τε .
16.342 μνηστῆρες δʹ ἀκάχοντο κατήφησάν τʹ ἐνὶ θυμῷ ,
16.343 ἐκ δʹ ἦλθον μεγάροιο παρὲκ μέγα τειχίον αὐλῆς ,
16.344 αὐτοῦ δὲ προπάροιθε θυράων ἑδριόωντο .
16.345 τοῖσιν δʹ Εὐρύμαχος , Πολύβου πάϊς , ἦρχʹ ἀγορεύειν ·
16.346 ὦ φίλοι , ἦ μέγα ἔργον ὑπερφιάλως τετέλεσται
16.347 Τηλεμάχῳ ὁδὸς ἥδε · φάμεν δέ οἱ οὐ τελέεσθαι .
16.348 ἀλλʹ ἄγε νῆα μέλαιναν ἐρύσσομεν ἥ τις ἀρίστη ,
16.349 ἐς δʹ ἐρέτας ἁλιῆας ἀγείρομεν , οἵ κε τάχιστα
16.350 κείνοις ἀγγείλωσι θοῶς οἶκόνδε νέεσθαι .
16.351 οὔ πω πᾶν εἴρηθʹ , ὅτʹ ἄρʹ Ἀμφίνομος ἴδε