12.270 ἀχνύμενος κῆρ ·
12.271 κέκλυτέ μευ μύθων κακά περ πάσχοντες ἑταῖροι ,
12.272 ὄφρʹ ὑμῖν εἴπω μαντήια Τειρεσίαο
12.273 Κίρκης τʹ Αἰαίης , ἥ μοι μάλα πόλλʹ ἐπέτελλε
12.274 νῆσον ἀλεύασθαι τερψιμβρότου Ἠελίοιο ·
12.275 ἔνθα γὰρ αἰνότατον κακὸν ἔμμεναι ἄμμιν ἔφασκεν .
12.276 ἀλλὰ παρὲξ τὴν νῆσον ἐλαύνετε νῆα μέλαιναν .
12.277 ὣς ἐφάμην , τοῖσιν δὲ κατεκλάσθη φίλον ἦτορ .
12.278 αὐτίκα δʹ Εὐρύλοχος στυγερῷ μʹ ἠμείβετο μύθῳ ·
12.279 σχέτλιός εἰς , Ὀδυσεῦ · περί τοι μένος , οὐδέ τι γυῖα
12.280 κάμνεις · ἦ ῥά νυ σοί γε σιδήρεα πάντα τέτυκται ,
12.281 ὅς ῥʹ ἑτάρους καμάτῳ ἁδηκότας ἠδὲ καὶ ὕπνῳ
12.282 οὐκ ἐάᾳς γαίης ἐπιβήμεναι , ἔνθα κεν αὖτε
12.283 νήσῳ ἐν ἀμφιρύτῃ λαρὸν τετυκοίμεθα δόρπον ,
12.284 ἀλλʹ αὔτως διὰ νύκτα θοὴν ἀλάλησθαι ἄνωγας
12.285 νήσου ἀποπλαγχθέντας ἐν ἠεροειδέι πόντῳ .
12.286 ἐκ νυκτῶν δʹ ἄνεμοι χαλεποί , δηλήματα νηῶν ,
12.287 γίγνονται · πῇ κέν τις ὑπεκφύγοι αἰπὺν ὄλεθρον ,
12.288 ἤν πως ἐξαπίνης ἔλθῃ ἀνέμοιο θύελλα ,
12.289 ἢ Νότου ἢ Ζεφύροιο δυσαέος , οἵ τε μάλιστα
12.290 νῆα διαρραίουσι θεῶν ἀέκητι ἀνάκτων .
12.291 ἀλλʹ ἦ τοι νῦν μὲν πειθώμεθα νυκτὶ μελαίνῃ
12.292 δόρπον θʹ ὁπλισόμεσθα θοῇ παρὰ νηὶ μένοντες ,
12.293 ἠῶθεν δʹ ἀναβάντες ἐνήσομεν εὐρέι πόντῳ .
12.294 ὣς ἔφατʹ Εὐρύλοχος , ἐπὶ δʹ ᾔνεον ἄλλοι ἑταῖροι .
12.295 καὶ τότε δὴ γίγνωσκον ὃ δὴ κακὰ μήδετο δαίμων ,
12.296 καί μιν φωνήσας ἔπεα πτερόεντα προσηύδων ·
12.297 Εὐρύλοχʹ , ἦ μάλα δή με βιάζετε μοῦνον ἐόντα .
12.298 ἀλλʹ ἄγε νῦν μοι πάντες ὀμόσσατε καρτερὸν ὅρκον ·
12.299 εἴ κέ τινʹ ἠὲ βοῶν ἀγέλην ἢ πῶυ μέγʹ οἰῶν
12.300 εὕρωμεν , μή πού τις ἀτασθαλίῃσι κακῇσιν
12.301 ἢ βοῦν